Опен доор

Опен доор сонин нь долоо хоног тутмын сонин бөгөөд Хэвлэлийн хүрээлэнгийн судалгаагаар нэг дугаар дунджаар 2500 ширхэг хувь борлогддог, хамгийн түгээмэл сонины тоонд ордог. (Монголын хэвлэл мэдээлэл – Өнөөдөр, Хэвлэлийн хүрээлэн / www.pressinst.org.mn )

Өдрийн сонин, Үндэсний шуудан зэрэг өдөр тутмын хэвлэлд ажиллаж байсан сэтгүүлч Б.Ганчимэг тус сониныг 2014 онд үүсгэн байгуулсан. Тэрээр нийтлэлд суурилсан сэтгүүлзүйг хөгжүүлэхэд үйл ажиллагаагаа зориулна хэмээн мэдэгдэж байв.

Сонины агуулгыг харвал цаг үеийн асуудлаар хийсэн ярилцлага, мөн сэтгүүлчийн дүн шинжилгээ бүхий нийтлэл гол байр суурийг эзэлж буй бөгөөд эдгээрээс гадна гадаад, дотоодын бүхий л салбарын мэдээ, мэдээллийг нийтэлж байна. Мэдээ, материалуудаа “Цаг үе”, “Үзэл бодол ба хүмүүс”, “Ярилцъя”, “Элсэн цаг”, “Шинэ Монгол”, “Эдийн засаг”, “Ертөнц”, “Нэг дэлхий”, “Үг”, “Монгол брэнд”, “Интертайнмент”, “Эрүүл мэнд”, “Зөвлөгөө”, “Өөр өнцөг”, “Цагийн өнгө”, “Танин мэдэхүй”, “Фото урлан”, “Философи”, “Технологи”, “Хөтөч”, “Завсарлага” зэрэг байнгын сэдэвчилсэн нүүрээр байрлуулдаг. /“Опен доор” сонины 2016 оны 8, 9, 10 дугаар сарын дугаарууд дээр хийсэн ажиглалт/

Долоо хоногт 1 удаа 32 нүүрээр, А3 форматаар хэвлэгдэн гардаг. Одоогоор цахим хувилбаргүй, цахим сайтгүй. Сонины уриа үг: Нээлттэй нийгмийн төлөө. Үүсгэн байгуулагч, сэтгүүлч Б.Ганчимэг нь тус сониныг анх байгуулахдаа хараат бус, зөвхөн хэсэг сэтгүүлчдийн гаргаж буй сонин хэмээн мэдэгдсэн. Тэрээр 2016 оны УИХ-ын сонгуулийн дараа Монцамэ агентлагийн даргаар томилогдож очсон.