Монгол Масс медиа групп

Монгол Масс Медиа групп 2004 онд Монгол Масс Медиа ХХК нэртэйгээр үүсгэн байгуулагдсан. Өдөр тутмын “Ардын эрх” сониныг гаргаж байгаад (эх сурвалж: Д.Нарантуяагийн ярилцлага) 2007 оноос www.news.mn сайтыг ажиллуулж эхэлсэн. Тухайн үед Монгол Масс Медиа ХХК-ийн 50 хувийг Алтан тариа ХХК-ийн ерөнхий захирал П.Цэлмүүн, 50 хувийг Бодь групп эзэмшиж байсан. 2009 оноос Алтан тариа ХХК 50 хувиа Бодь группт зарж, 2009 оноос Монгол Масс Медиа ХХК-ийг 100 хувь эзэмшдэг болсон. Тухайн үед “Бодь” групп “Боловсрол” телевиз, “Ийгл” телевизийн лицензийг эзэмшдэг байсан. Үүн дээрээ “Ардын Эрх”, “News”-ийг нэмээд шинэ бүтэц, менежменттэй Монгол Масс Медиа групп болгосон.

“Бодь” группийг УИХ-ын гишүүн Лу.Болд, Д.Баясгалан, УИХ-ын гишүүн асан М.Зоригт нар 1989 онд “Бодь” хоршоо нэртэйгээр үүсгэн байгуулагдсан. 2004 оноос УИХ-ын гишүүн асан М.Зоригт “Бодь” группийн бүх хувьцаагаа Д.Баясгаланд шилжүүлж “Бодь” группээс гарсан. “Бодь” групп банк санхүү, даатгал, мэдээлэл харилцаа холбоо, автомашины худалдаа, барилгын гүйцэтгэл, хөрөнгө оруулалт, ложистик, компьютерийн худалдаа үйлчилгээ, үл хөдлөх хөрөнгө, электрон барааны худалдаа, хэвлэл мэдээлэл гэх мэт салбарт бизнес эрхэлдэг.

2013 оноос “Бодь” группийг үүсгэн байгуулагчид хөрөнгийн маргаан үүсгэж, тус групп хоёр хуваагдан, Д.Баясгалан “Голомт банк” болон Монгол Масс Медиа групп, “Бодь” групп-ийн зарим охин компаниуд эзэмшдэг болсон. Одоо Д.Баясгалан “Бодь Интернэйшнл” компанийн 100 хувь эзэмшдэг. Тус компани “Голомт” банкны 85 хувийн хувьцааг эзэмшдэг. Бусад эзэмшдэг компанийн тухай мэдээлэл олдоогүй. Голомт банк /47,597,028,345 төгрөг/ болон “Бодь Интернэйшнл” ХХК /7,863,238,247 төгрөг/ сүүлийн 5 жилд татвар төлөлтөөрөө тэргүүлдэг топ 100 аж ахуйн нэгжид орсон (http://www.mta.mn/news/show/1119)

Монгол Масс Медиа групп медиа зах зээлийн салбарт үйл ажиллагаа явуулж байгаа бие даасан, тус тусын компанийн нэгдэл юм. Нийт 400 гаруй ажиллагчидтай, 8 үндсэн компаниас бүрдсэн. Үүнд: “Монгол Масс Медиа” ХХК, Үндэсний "Боловсрол суваг" телевиз ХХК, Ийгл бродкастинг ХХК, "Boxnetwork" ХХК /Box sport, Box movie, Box music/, "Dream" телевиз ХХК, Шууд Ти Ви ХХК, Ардын эрх сонин, Үндэсний "Тойм" сэтгүүл , FM 91.1 радио, "Монгол комикс" ХХК багтаж байна. Монголын медиа зах зээл дээрх албан ёсны, технологийн өндөр шаардлага хангасан контент үйлдвэрлэгч, нийлүүлэгч, түгээгч болох, дотоодын онцлогийг тусгасан Монгол контентуудыг дэлхийн зах зээлд гаргах зорилготой.

Монгол Масс Медиа групп “Гэр Контент”, “Монголын Медиа Корпораци” гэсэн үндсэн 2 бүрэлдэхүүнтэй. “Гэр Контент”-т “Боловсрол” телевиз, Movie Box, Box sport, Box movie, Box music, "Dream" телевиз, Шууд ТВ худалдааны суваг зэрэг энтертаймент сувгууд, "Hulegu pictures" кино компани багтдаг. “Монголын Медиа Корпораци”-д “Eagle news” телевиз, Ардын эрх сонин, Үндэстний тойм сэтгүүл, www.eagle.mn сайт, FM 91.1 зэрэг мэдээллийн хэрэгслүүд багтдаг.