Монголын мэдээ

Монголын мэдээ сонин нь өдөр тутмын сонин бөгөөд 2015 оны байдлаар нэг дугаар нь дунджаар 2000 хувь борлогддог, Монголын хамгийн түгээмэл 10 сонины нэг юм. (Монголын хэвлэл мэдээлэл – Өнөөдөр, Хэвлэлийн хүрээлэн / www.pressinst.org.mn )

1998 онд байгуулагдсан. Үүсгэн байгуулагч нь банк санхүү, зам тээвэр, барилгын салбарт олон салбар компани бүхий “Эрэл” группийн эзэн, “Эх орон” намын дарга Б.Эрдэнэбат боловч түүний эзэмшилд байхаа больсон. Одоо эрхлэгч С.Гантогоо болон тус сонинд ажиллаж буй хэсэг сэтгүүлчдийн эзэмшилд буй хэмээн өөрсдөө мэдэгдсэн.

Сонины редакци өөрийн сониныг нийтлэлийн тодорхой чиглэлгүй хараат бус мэдээллийн хэрэгсэл хэмээн мэдэгдсэн. Энэ сонин голчлон өдөр тутмын мэдээ, нийтлэл, сурвалжлагыг нийтэлдэгээс гадна улс төр, нийгэм, эдийн засаг, спорт, шинжлэх ухаан, чөлөөт цагийн тухай мэдээлэл ч мөн гаргадаг. Шуурхай мэдээллийг өрсөж уншигчдад хүргэхэд чиглэдэг. Долоо хоногт 5 удаа 8 нүүрээр, А2 форматаар хэвлэгдэн гардаг, мөн цахим хэлбэрээр захиалж унших боломжтой. Сонины дэргэд www.mminfo.mn сайтыг ажиллуулдаг.

Мэдээ, материалуудаа “Улс төр”, “Үзэл бодол”, “Дэлхий”, “Шуурхай мэдээ”, “Завсарлага”, “Дугаарын сурвалжлага”, “Спорт”, “Сурталчилгаа”, “Онцлох хуудас” “Чухал хүн”, “Энтертайнмент” зэрэг байнгын сэдэвчилсэн нүүрээр байрлуулдаг. /“Монголын мэдээ” сонины 2016. 8, 9, 10 дугаар сарын дугаарууд дээр хийсэн ажиглалт/

Монголын мэдээ сонинг анх УИХ гишүүн асан, Эрэл ХХК-ний захирал Б.Эрдэнэбат хөрөнгө оруулж үүсгэн байгуулж байсан бол, 2008 оноос Монголын Ардчилсан Холбоо буюу УИХ гишүүн асан, АН-ын гишүүн Х.Баттулгын эзэмшилд шилжсэн хэмээн үздэг.