Үндэсний шуудан

Үндэсний шуудан нь өдөр тутмын сонин бөгөөд 2015 оны байдлаар нэг дугаар нь дунджаар 5000 хувь борлогддог, Монголын хамгийн олон уншигчтай сонины нэг юм. (Монголын хэвлэл мэдээлэл – Өнөөдөр, Хэвлэлийн хүрээлэн / www.pressinst.org.mn/) 

2007 онд “Зууны мэдээ” сонинд ажиллаж байсан хэсэг сэтгүүлчид тасран гарч “Үндэсний шуудан” сониныг байгуулжээ. Анх “Зууны шуудан” нэртэйгээр хэвлэгдэж байсан тус сонины нэр дээр маргаан үүсч “Үндэсний шуудан” болон тогтсон. Тус сонины үүсгэн байгуулагч нь Б.Ганболд. Сэтгүүлч мэргэжилтэй. Тэрээр мөн Монголын Үнэн сонины ерөнхий эрхлэгчийн албыг хашдаг.

Сонины уриа үг нь “Эрүүл сэтгүүлзүйн төлөө”. Долоо хоногт 5 удаа 12 нүүрээр, А2 форматаар хэвлэгдэн гардаг, мөн цахим хэлбэрээр захиалж унших боломжтой. Мэдээ, материалуудаа “Улс төр”, “Дэлхийн эдийн засаг”, “Цаг үе”, “Өдрийн төрх”, “Технологи”, “Эрүүл мэнд”, “Таны сонорт”, “Who is who”, “Спорт”, “Өөрөөс нь”, “Завсарлага”, “Танин мэдэхүй” зэрэг байнгын сэдэвчилсэн нүүрээр байрлуулдаг. /“Үндэсний шуудан” сонины 2016. 8, 9, 10 дугаар сарын дугаарууд дээр хийсэн ажиглалт/

Үндэсний шуудан сонинг Зууны шуудан ХХК эзэмшиж, эрхлэн гаргадаг. Бусад салбарын бизнесийн эрх ашиг буй эсэх нь тодорхойгүй, арилжаа сурталчилгааны орлогоо мэдүүлээгүй болно.