Үндэсний мэдээ

Үндэсний мэдээ сонин нь 2015 оны байдлаар нэг дугаар нь дунджаар 4000 хувь борлогддог, Монголын өдөр тутмын сонины нэг юм. (Монголын хэвлэл мэдээлэл – Өнөөдөр, Хэвлэлийн хүрээлэн / www.pressinst.org.mn/) 

2011 онд үүсгэн байгуулагдсан бөгөөд Монголд анх удаа хоёр хувилбартайгаар гарч ирсэн. Өдөр тутмын буюу 7 хоногт 6 дугаар, тойм дугаар буюу долоо хоногт 2 удаагийн дугаартайгаар анх гарч байсан ч одоо өдөр тутмын сонин нь үлдээд байна. Сонины нээлт нь төв талбай дээр урлаг соёлын оддын тоглолтоор эхэлж байсан, мөн захиалагчиддаа 25 автомашин хожих сугалаат хонжвор зарлаж байсан зэргээс харахад ихээхэн хөрөнгө оруулалт татаж байсан нь дамжиггүй. (http://hiimori.mn/2jq)

Үйл ажиллагааны чиглэлээ “Улс төр, нийгэм, эдийн засаг, бизнес, урлаг, спорт, гэмт хэргээс урьдчилан сэргийлэх мэдээ, мэдээллийг хэвлэн нийтлэх” хэмээн тодорхойлсон бөгөөд сонины уриа үг нь “Иргэн бүр сэтгүүлч байя, Монголын төлөө бичнэ”. Энэ сонин голчлон өдөр тутмын мэдээ, нийтлэл, сурвалжлагыг нийтэлдэгээс гадна улс төр, нийгэм, эдийн засаг, спорт, шинжлэх ухаан, чөлөөт цагийн тухай мэдээлэл ч мөн гаргадаг.

Долоо хоногт 6 удаа 8 нүүрээр, А2 форматаар хэвлэгдэн гардаг, Мэдээ, материалуудаа “Улс төр”, “Эдийн засаг”, “Цаг үе”, “Танин мэдэхүй”, “Баримт, байр суурь”, “Үйл явдал”, “Ертөнц”, “Залуус”, “Нийгэм”, “Спорт” “Чөлөөт цаг”, “Соёл урлаг”, “Энэ тухай” зэрэг байнгын сэдэвчилсэн нүүрээр байрлуулдаг. /“Үндэсний мэдээ” сонины 2016. 8, 9, 10 дугаар сарын дугаарууд дээр хийсэн ажиглалт/

Үндэсний мэдээ сонинг Таван толгой транс ХХК эзэмшиж, эрхлэн гаргадаг. Тус ХХК нь УИХ гишүүн асан, АН-ын гишүүн Д.Бат-Эрдэнийн “Ажнай” группт хамаарагддаг. Тэрээр бусад салбарт ч бизнесийн компаниудтай. Тус сонины эрхлэгчээр “Өнөөдөр” сонинд ажиллаж байсан, сэтгүүлч Ш.Даваадорж ажилладаг.