Өглөөний сонин

Өглөөний сонин нь өдөр тутмын сонин бөгөөд 2015 оны байдлаар нэг дугаар нь дунджаар 2300 хувь борлогддог, Монголын хамгийн түгээмэл сонины нэг юм. (Монголын хэвлэл мэдээлэл – Өнөөдөр, Хэвлэлийн хүрээлэн / www.pressinst.org.mn ) 

Тус сонины үүсгэн байгуулагч нь Р.Хадбаатар (сэтгүүлч мэргэжилтэй, Монголын сонины холбооны ерөнхийлөгч асан), Л.Нинжжамц (сэтгүүлч мэргэжилтэй, 2016 оны 9 сард Монголын Үндэсний телевизийн захирал болсон) нар юм. Одоо тус сонины эрхлэгчээр сэтгүүлч З.Боргилмаа ажиллаж байна.

Энэ сонин голчлон улс төр, нийгмийн тухай мэдээ, мэдээллийг нийтлэхээс гадна, эдийн засаг, спорт, шинжлэх ухаан, чөлөөт цагийн, цаг үеийн тухай мэдээлэл ч мөн гаргадаг. Долоо хоногт 5 удаа 8 нүүрээр, А2 форматаар хэвлэгдэн гардаг, мөн цахим хэлбэрээр захиалж унших боломжтой. Сонины сайт нь www.morningnews.mn

Мэдээ, материалуудаа “Улс төр”, “Нийгэм”, “Эрэн сурвалжлах”, “Сурталчилгаа”, “Цаг үе”, “Чөлөөт цаг”, “Дэлхий дахинд”, “Спорт”, “Уул уурхай”, “Шар мэдээ” зэрэг байнгын сэдэвчилсэн нүүрээр байрлуулдаг. /“Өглөөний сонин”-ы 2016. 8, 9, 10 дугаар сарын дугаарууд дээр хийсэн ажиглалт/

Одоо Өглөөний сонинг Г.Анархүү, Э.Боролдой нар эзэмшдэг. Г.Анархүү нь www.news.mn агентлагийн захирал Б.Тэмүүлэнгийн төрсөн хүү, Э.Боролдой нь тус сонины үүсгэн байгуулагчдын нэг Л.Нинжжамцын төрсөн хүү юм.