Монголын үнэн

Монголын үнэн сонин нь өдөр тутмын сонин бөгөөд 2015 оны байдлаар нэг дугаар нь дунджаар 4000 хувь борлогддог, Монголын хамгийн олон уншигчтай сонины нэг юм. (Монголын хэвлэл мэдээлэл – Өнөөдөр, Хэвлэлийн хүрээлэн / www.pressinst.org.mn )

Монголын хамгийн ууган хэвлэлийн нэг болох Монголын үнэн сонины анхны дугаар 1920 онд гарсан гэдэг. Монголд ардчилсан хувьсгалыг дэмжих үүднээс тухайн үеийн Зөвлөлт Холбоот Улсад анхны дугаарыг хэвлүүлж олон нийтэд тарааж байжээ. 1925 онд МАХН-ын (Одоогийн МАН) төв хорооноос эрхлэн гаргах болсоноор албан ёсоор тус намын дэргэдэх хэвлэл болсон аж. (Монголын сэтгүүлзүйн түүхэн тойм, Л.Норовсүрэн, УБ, 2000 он) Тус сонин 1925 оноос “Үнэн” хэмээн нэрээ өөрчилсөн ч 2010 оноос “Монголын үнэн” болгож, анхны нэрээрээ гарах болсон байна.

Үйл ажиллагааны чиглэлээ “Улс төр, нийгэм, эдийн засаг, урлаг, спортын салбарын үйл явдал, тулгамдсан асуудал, олон улсын амьдрал зэрэг мэдээ, мэдээллийг хэвлэн нийтлэх” хэмээн тодорхойлсон. МАН-ын төв хэвлэл тул тус намын бодлого, үйл ажиллагааг дэмжин сурталчилдаг бөгөөд түүнчлэн цаг үеийн болон нийгэм, эдийн засгийн мэдээ, мэдээллийг мөн нийтэлдэг.

Тус сонины эрхлэгч сэтгүүлч Б.Ганболд. Тэрээр “Үндэсний шуудан” сониныг үүсгэн байгуулсан бөгөөд одоо ТУЗ-ийн даргын албыг хашдаг. Мөн “Өдөр тутмын сонины холбоо”-ны ерөнхийлөгчийн сонгуульт ажилтай. Одоогийн ЗГХЭГ-ын дарга Ж.Мөнхбат нь тус сонины ерөнхий эрхлэгчээр ажиллаж байв.

Сонины уриа үг нь “Үнэнийг зөвхөн Монголын үнэнээс”. Долоо хоногт 5 удаа 8-12 нүүрээр, А2 форматаар хэвлэгдэн гардаг, мөн цахим хэлбэрээр захиалж унших боломжтой. Сонины сайт нь www.unen.mn. Өөрийн хэвлэх үйлдвэртэй. Мэдээ, материалуудаа “Улс төр”, “Эрх зүй”, “Эрүүл мэнд”, “Эдийн засаг”, “Утга зохиол”, “Гадаад мэдээ”, “Спорт”, “Чөлөөт цаг”, “Цаг үе”, “Нийгэм”, “Урлаг” “Хүмүүс” зэрэг байнгын сэдэвчилсэн нүүрээр байрлуулдаг. /“Монголын үнэн” сонины 2016. 8, 9, 10 дугаар сарын дугаарууд дээр хийсэн ажиглалт/